Ekainaren 29an hasiko da Frantziako Tourra Florentzian. Ormaiztegiarrarekin batera, Guillaume Martin, Bryan Coquard, Alexis Renard eta Simon Geschke taldekideak konfirmatu ditu Cofidisek.
Aurtengoa bere hamargarren edizioa izango da Tourrean. Iaz, zazpi urteren ondoren, etapa bat irabazi zuen berriz Frantzian Izagirrek. Aurreko garaipena, 2016ko Tourrean lortu zuen. Oraingoz Cofidisek ez du konfirmatu Gorka Izagirre Tourrean egongo den.
Tourra aldaketekin dator
2024ko Frantziako Tourraren formatua eta egutegian aldaketak daude aurten. Joko Olinpikoak Parisen ospatzen direnez, astebete aurreratu da eta ondorioz, ekainaren 29tik uztailaren 21era ospatuko da aurten. Horrez gain, historian lehen aldiz, ez da Frantziako hiriburuan amaituko, Nizan baizik.
111. edizioa izango da aurtengoa. 21 etapetan banatuta egongo da, 3492 kilometro guztira, 52.230 metroko desnibel positiboarekin.
