Grafiko hauek egiteko, EITBk eta Tokikomek Espainiako Estatistika Institutuak argitaratutako (INE) udal-erroldei buruzko datu demografikoak bildu, prozesatu eta aztertu dituzte. Euskal Autonomia Erkidegoko eta Nafarroako datu guztiak deskargatu dira, eskualdeka eta udalerrika banatuta, 2002tik 2021era; azken urte hori erakundeak 2022ko urtarrilaren 1ean argitaratutako erroldei buruzko datuei dagokiena izan da.
Immigrantearen jatorria zehazteko , INEk pertsona horien jaioterriak jasotzen ditu, herrialde bakoitzeko komunitate handietan multzokatuta. Hala ere, kasu batzuetan ezin izan da identifikatu jaiotzaren leku zehatza, eta, beraz, jatorrizko kontinentearekin batera katalogatu dira “Besteak” atala zehaztuta.
Datuak antolatu ondoren, immigrazioaren joerak eta bilakaerak identifikatzeko aztertu dira, bai nazio-mailan, bai toki-mailan. Prozesu horretan, hainbat bistaratze egin dira balizko istorioak aurkitzeko.
Gainera, ikuspegi osoagoa lortze aldera, elkarrizketak egin ditugu adituekin eta etorkinekin beraiekin. Hauek, saio berezi batean bildu ditugu.
Atzerrian jaiotako herritarren bilakaera
2002tik gaur egun arte, ordea, aldatu egin da kanpotik etorritako pertsonen kopurua eta jatorria. 2002an oso gutxi ziren Espainiar Estatutik kanpo jaiotakoak gurean; gaur egun, populazioaren zati esanguratsua dira. Datuak herriz herri alderatzen baditugu, ordea, desberdintasun nabarmenak topatuko ditugu.
Nondik etorri dira atzerrian jaiotako pertsonak?
Mundu osoko txokoetako immigranteak jaso ditu Goierrik. Ondorengo grafikoan, jatorri nagusienak ikus ditzakegu, baita 2002tik 2021era hauek izandako bilakaera ere.
Jatorri ezberdinen bilakaera Hego Euskal Herrian eta Goierrin
Gizarte hartzailearen beharrek eta jatorrizko herrialdeen egoerak zein giza-sareek baldintzatzen dute migrazioa. Horrela, desberdintasunak agerikoak dira Hego Euskal Herriko atzerritarren jatorriak eta Goierrikoenak alderatzen baditugu. Goierriko ekonomian industriak duen nagusitasunak (Hego Euskal Herrian baino handiagoa) eta immigranteek tokian-tokian garatutako sareek azal litzakete ondorengo grafikoetan azaleratzen diren desberdintasunak.
Goierrin, nabarmena da errumaniarrek duten pisua. Izan ere, Errumaniako ekonomia historikoki industriara bideratuta egon da Xabier Aierdi, soziologian doktore eta Begirune Fundazioko presidentearen arabera. Hego Euskal Herrian, aldiz, zaintzara bideratu da gehien bat immigrazioa Hego Amerikatik etorritako emakumeen bidez.
Eta herriz herri?
Hego Euskal Herria eta Goierri alderatu ditugu. Baina, Goierriko herrien artean, ba al da desberdintasunik? Suposatzekoa den bezala, noski baietz. Immigranteek herriz herri duten banaketa askotarikoa da bai kopurua, zein jatorria kontuan hartuta. Ondorengo grafikoan Goierriko herrietan jatorri bakoitzak duen pisua adierazten da. Jatorri horietako herritar kopurua ere kontsultatu daiteke, herriz herri.
Immigrazioa eta generoa
Arestian aipatu bezala, Hego Amerikako emakumeak izan dira zaintzaren sektorean txertatu diren langileak, gehien bat. Izan ere, jatorri ezberdinetatik datozen pertsonek egiten dituzten lan motek eta immigrante horien generoak elkar baldintzatzen dute. Horrela, Europatik, Afrikatik eta Asiatik etorritakoen gehiengoa gizonezkoa dira, nahiz eta proportzioa orekatzen joan den 2002tik hona. Hego Amerikatik datozenen kasuan, aldiz, aldea handitu egin da eta, gehiengoa, emakumeak dira.
Saretzen - Immigrazioa saio berezia
Datuetan murgilduta ibili ondoren, zenbaki horiei izena eta izana jarri nahi izan diegu. Kanpotik etorritako goierritarrekin izan gara horretarako. Gainera, immigrazioa fenomeno bezala ulertzeko, Xabier Aierdi, soziologian doktore eta Begirune Fundazioko presidentearengana jo dugu.
Bildutako adierazpenekin, saio berezia osatu dugu Goierriko immigrazioa ulertu ahal izateko. Hemen ikus daiteke.
