Beasaingo txosnagunetik jaigiroan zegoen udaltzain bat kanporatzea salatu zuen asteartean ErNE Euskal Poliziaren Sindikatuak. ErNEk adierazitakoaren arabera, astelehenean txosnetan zegoela, publikoki seinalatu zuten agentea eta gunetik joatera behartu zuten. Gertakari honen aurrean, adierazpen insituzionala onartu dute ostegunean Beasaingo Udala osatzen duten talde guztiek, EH Bilduk izan ezik.
Beasaingo EH Bilduk bere adierazpena helarazi du, jazotako gertakarien aurrean "ezadostasuna" adieraziz. "Bere ogibideagatik bereizkeria jasan duten herritarrei" babesa eman nahi izan diete. Elkarbizitza lortzeko bidean, ezberdin pentsatzen duten pertsonek eraikitako herria helburu dutela esan du EH Bilduk.
Eragileei aitortza
Komunikabideei helarazitako adierazpenean, EH Bilduk balioan jarri nahi izan du urte luzez herriko eragile ezberdinek herriko jaiak
aberasten eta antolatzen egindako lana. "Zentzu horretan, ez litzateke zilegi ekintza konkretu hauen ondorioek Beasaingo eragileen etorkizuneko lana baldintzatzea."
Jaietako bigarren asteburuan "antzeko gertakaririk" ez errepikatzeko deia luzatu dute. Bizikidetzaren alde lanean jarraituko dutela berretsiz amaitu du Beasaingo EH Bilduk bere adierazpena.