ErNE sindikatuak ekainaren 3an argitaratu zuen Beasaingo Loinatz Jaietan gertatutako egoeraren inguruko salaketa. Honen esanetan, udaltzaingo bat txosna-gunean aurkitzen zen “erabilera publikoko espazio batean aisialdiaz gozatuz, megafoniaren bidez txosna-gunetik alde egiteko agindu ziotenean, eta Euskal Poliziako kide izate hutsagatik publikoki adierazi zutenean”.
Egoera guztiz gaitzetsi du ErNEk, gertakariak “erabat lotsagarriak” izendatuz eta hurrengoa gehituz: “pertsonen eta, bereziki, zerbitzari publiko baten duintasunaren, askatasunaren eta oinarrizko eskubideen aurkako eraso zuzena, egunero bere osotasuna arriskuan jartzen duena, guztion segurtasuna bermatzeko, baita orain espazio publiko batera sartzeko baimena ematen diotenena ere”.
Irakurri HEMEN ErNEren artikulua.
Beasaingo Udalak, EAJ, PSE-EE eta Elkarrekin Podemos taldeen babesarekin, gertakarien inguruko adierazpen instituzionala partekatu du. EH-Bilduk ez du bat egin adierazpenarekin.
"Beasaingo Udalak, udalbatza honetan ordezkatuta dauden EAJ-PNV, PSE-EE eta Elkarrekin Podemos taldeen babesarekin, bere kezka eta gaitzespena adierazi nahi du txosnetako jai-esparruan izandako gertakarien aurrean, non hainbat pertsona handik alde egitera behartu zituzten, ogibidez polizia-agente izateagatik.
Azpimarratu nahi dugu horrelako jarduerak bateraezinak direla gizarte demokratiko, plural eta errespetuzko baten balioekin. Jai herrikoiak elkartzeko, ospatzeko eta aniztasunerako guneak izan behar dute, eta ez bazterkeria edo diskriminazio tokiak.
Bizikidetza egunez egun eraikitzen dela sinetsita, horrelako gertaerek ere gizarte gisa hausnartzera bultzatu behar gaituztela uste dugu. Gaitzespenetik haratago, gure erantzukizun kolektiboa errespetuaren, elkarrizketaren eta giza eskubideen kultura sustatzea da.
Balioetan hezteko konpromisoa berresten dugu: berdintasuna, diskriminaziorik eza, desberdinarekiko errespetua eta gorrotoaren arbuioa. Balio horiek izan behar dute gure politika publikoen eta eguneroko bizitzaren ardatza.
Horregatik, Txosna Batzordeko ordezkariei publikoki honako adierazpen hauek egitea eskatzen diegu:
- Eman diren diskriminazio eta hertsapen jarrerak gaitzestea.
- Erasotutako pertsonei barkamena eskatzea.
- Horrelako jarrerak errepikatuko ez direnaren konpromisoa hartzea.
Edozein kasutan, Beasaingo Udalak Txosna Batzordearekin duen hitzarmena berrikusiko du, jai-esparru honetan ere gure gizartearentzat funtsezkoak diren printzipio demokratikoak bermatu eta Beasaingo bizikidetzari kalte besterik egiten ez dioten eraso hauek errepikatu ez daitezen.
Beasainen, 2025eko ekainaren 5an."