Trafiko eta aparkalekuen ordenantza berria datorren apirilaren 1ean jarriko da indarrean baina horren aurretik, herritarren zalantzak argitzeko eta egoiliar-baimena eskatzeko tramiteak egiteko, TAO bulegoa ireki da udaletxean.
Beasaingo Udalaren ustez, TAO berriak, Beasainen ibilgailuen aparkalekua modu eraginkorrean erregulatuko du, ingurumenean, espazio publikoaren kalitatean zein pertsonen irisgarritasunean inpaktu positibo bat izan dezan. Gainera, etxebizitzetara, zerbitzu publikoetara eta herriko merkataritza guneetara sarbidea ere errazteko balioko du. Halaber, araudi honek mugikortasun modu ekologikoagoak sustatzea du helburu, garraio publikoa, ibilgailu partekatua edota oinez zein bizikleta bidezko desplazamenduak lehenetsiz, ongizatean duten eragin positiboa kontuan hartuta.
Araudi berriak hiru berrikuntza nagusi ditu: S2 sektore berria sortzen da (Barrendain plazatik Dolarearaino), egoiliar-baimena dutenentzat aparkaleku esklusiboak txertatzen dira erdigunean, landa auzoetako bizilagunentzako zein merkatari txikientzako baimenak ahalbidetzen dira eta sektore guztietan lehen 20 minutuak doan izango dira tiketarekin (egoiliarrentzako plaza esklusiboetan ezik).
Sektore berria
Gaur egun Ezkiaga auzoko eta erdiguneko TAO sektoreak bereizten diren bezala, ordenantza berriak hirugarren sektore bat sortu du. Hain zuzen ere, Barrendain plaza eta Garmendia-Otaola ardatzetik Dolarea parkera arte gelditzen den eremua.
Udalak adierazi duenez, sektoreak hartzen duen eremuan aparkaleku gabeziak presio handia eragiten du. Batetik, Beasaindik kanpo garraio publikoa hartzeko datozenek eremu honetan sortzen duten aparkaleku presioa. Bestetik, Beasainera lan egitera etorri eta sektore honetan aparkatzen dutenek sortutako presioa. Gainera, gune honetan etxebizitza askok ez dute aparkaleku pribaturik.
Egoiliar baimenduak lehenetsi
Erdiguneko S1 eta S2 sektoreetan, baimendutako egoiliarrentzako aparkaleku esklusiboak sortuko dira, guztira 425 plaza. Horrela, baimenduek denbora mugagabean aparkatu ahal izango dute dagokien sektoreko Bertakoak ikurrekin seinaleztaturiko plazetan. Horietatik, 120 plaza Gipuzkoa Plazan kokatuko dira eta beste hainbat Esteban Lasa, San Inazio, Oriamendi 32-47, Nekolalde, Mendeurren eta Nabarro Larreategi kaleetan. Horretaz gain, egoiliar baimenduek beraien sektoreko gune urdin osoan ere aparkatu ahal izango dute baldintza berdinetan.
Ezkiaga (ZE) sektorean aldiz, orain arteko araudiak emandako emaitza positiboak ikusita, ez da aldaketarik egongo. Auzoko egoiliar baimenduen ibilgailuak baino ezingo dira aparkatu gune gorrian, astelehenetik ostiralera 23:00etatik 08:30era. Ordutegi honetatik kanpo, aparkatzea doakoa izango da.
Landa-auzoetako herritarren kasuak arreta bereziz aztertu du ordenantza berriak. Hori dela eta, landa-auzoetako egoiliar baimena sortu da. Baimen horrekin landa-auzotarrek euren ibilgailua gune berdeetan denbora mugagabean aparkatzeko aukera izango dute.
Merkatari-baimen berria
S1 edo S2 sektoreetan dauden merkatari txikiek ibilgailu batentzako baimena atera ahal izango dute, beti ere, ibilgailu hori Beasainen ez badago erregistratuta. Baimen honekin, dagokien sektoreko gune urdinean aparkatu ahal izango dute denbora mugarik gabe.
Kasu guztietan, TAO baimena eskuratu nahi duen edonork, gaur egun egoiliar-baimena dutenak barne, ezinbestean dagokion eskaera egin beharko dute TAO bulegoan (aurretik hitzordua hartuz) edota Udalaren egoitza elektronikoaren bitartez.
Egonaldi motaren araberako guneak
- Gune marroia (egonaldi motza): lehen 20 minutuak doan izango dira eta gehienez ordu eta erdi aparkatu ahalko da (1,5€). Egoiliar-baimenarekin ezingo da aparkatu. Gernika pasealekuko frontoi atzea, Barrendain plaza eta Anbulategia.
- Gune urdina (egonaldi ertaina): lehen 20 minutuak doan izango dira eta gehienez 4 ordu aparkatu ahalko da (4€). Goiz edo arratsaldeko ordutegi blokeak osatzeko aukera. Egoiliar-baimenarekin aparkatu ahal izango da, beti ere sektore berekoa bada. Erdigunean, S1 eta S2 sektoreetan kokatzen da.
- Gune berdea (egonaldi luzea, aparkaleku disuasorioak): lehen 20 minutuak doan izango dira eta gehienez 7,5 ordu aparkatu ahalko da (3€), egun osoa. Egoiliar-baimenarekin ezingo da aparkatu landa-auzoetako herritarrak izan ezik. Gipuzkoa plaza, Trenbide kalea eta Gernikako pasealekua.
- Gune gorria (Ezkiaga): Ezkiaga sektorean (ZE). Orain arte bezala. Ezkiaga auzoan bakarrik aparkatu ahal izango dute baimendutako egoiliarren ibilgailuak ordutegi honetan: astelehenetik ostiralera 23:00etatik 08:30era.
- B-R egoiliar-baimendun plaza esklusiboak (berria): bere sektorean baimenduta dauden egoiliarrek bakarrik aparkatu ahal izango dute (S1 edo S2). Urte osoan, 24 orduz. S1 sektorean baimendutako egoiliarrek ezin izango dute S2ko egoiliarren plazetan aparkatu, eta alderantziz.
Informazioa edota arreta bulegoan hitzordua eskatzeko deitu 661 202 832 telefono zenbakira, idatzi tao-ota@beasain.eus epostara, edo sartu www.beasain.eus/tao webgunean.
