Jasotako iradokizunen ondorioz, baldintza berri batzuk onartu dira araudian. Larunbat goizetan TAO zerbitzua 09:00etatik 13:00etara mantenduko da eta Loinatz landa auzoko bizilagunak, egoiliarrentzako gunean aparkatzeko aukera izango dute. Bestalde, Gipuzkoa plazako erabilera aztertu eta gero, bertakoentzako izango diren aparkaleku kopurua 80tik 120ra pasatuko da, %50 handituz.
Bestetik, ordenantza berriak hirugarren TAO sektore bat sortzea proposatzen du Barrendain plazatik gora, hau da, Garmendia-Otaola ardatzetik, Dolarea parkera arte gelditzen den eremura. Modu honetan, herrian 3 TAO sektore egongo lirateke, Ezkiagakoa, erdiguneko eremua eta orain proposatu den azken hau.
Aparkalekuak kolore desberdinak izango dituzte eta horren araberako ezaugarri desberdinak izango dituzte:
-
Gune marroia: Txandakatze altua. Gehienez 120 minutu aparkatu ahalko da. Egoiliar txartelarekin ezingo da aparkatu. Gernika pasealekuko frontoi atzea, Barrendain plaza eta Anbulategia.
-
Gune urdina: Txandakatze ertaina. Gehienez 240 minutu aparkatu ahalko da. Goiz edo arratsaldeko ordutegi blokeak osatzeko aukera. Egoiliar txartelarekin aparkatu ahal izango da, betiere sektore berekoak badira. Erdigunean, S1 eta S2 sektoreetan kokatzen da.
-
Gune berdea: Txandakatze baxua, aparkaleku disuasorioak. Gehienez 450 minutu aparkatu ahalko da, egun osoa. Egoiliar txartelarekin ezingo da aparkatu. Landa-auzoetako herritarrak salbuespena izango dira. Gipuzkoa plaza eta Gernikako pasealekua.
-
Gune gorria (Ezkiaga): Orain arte bezala. Ezkiaga auzoko egoiliarren ibilgailuak baino ezin dira aparkatu eta ordutegi berezia izango dute: astelehenetik ostiralera 23:00etatik 08:30era. Ezkiaga (ZE) sektorea.
-
Egoilarren gunea B-R (berria): S1 edo S2 sektoreetan txarteldun egoiliarrek soilik aparkatu ahal izango dute urte guztian zehar, 24 orduz. S1 sektoreko egoiliarrek ezingo dute S2 sektoreko egoilarren plazetan aparkatu eta alderantziz.
Gune guztietan lehenengo 20 minutuak doakoak izango dira betiere txartela aterata.
