Osasun Sailak Ataungo Udalari adierazi dionez, ur-laginak analizatu dituzte eta edangarria kalifikazioa lortu dute. Ostegunetik zeramaten ataundarrek iturriko ura ez kontsumitzeko gomendioarekin. Izan ere, pasa den asteko euri jasen ondorioz iturriko uraren uhertasun indizea altuegia zen edan ahal izateko. Hau da, lokatz eta zikinkeria gehiegi zuen urak. Orain, uraren kalitatea hobetuta, ostegunean ezarritako gomendioak bertan behera utzi dituzte.
Ura tratatzeko zentroa, aspaldiko eskakizuna
Martin Aramendi, Ataungo alkateak Goierri Telebistari ostiralean adierazi zionez, aspaldiko arazoa da euri asko egiten duenean ura zikin etortzea. Berritasuna, oraingo honetan, Osasun Sailak ura edangarri ez zegoelako abisua igortzea izan da. Ur-sarea hobetzeko proiektua martxan dagoela jakinarazi zuen alkateak eta ura tratatzeko zentroa bi urte barru eginda egotea espero du.
