Ataungo urak edangarritasuna galdu du, Eusko Jaurlaritzako Osasun Sailak Udalari jakinarazi dionez. Azkeneko analisien emaitzen ondorioz, Lareoko sarean (Ataun) iturriko ura ez edatea gomendatu dute.
Ura ez edateaz gain, gomendio gehiago ere luzatu dituzte:
- Edateko, elikagaiak prestatzeko, frutak edota barazkiak garbitzeko edo hortzak eskuilatzeko erabiltzen den iturriko urari tratamedu hauetakoren bat eman beharko zaio:
- Irakin ura hiru minutuz eta utzi hozten kontsumitu aurretik.
- Edateko ura desinfektatzeko gai den lixiba tanta bat edo bi gehitu ur litro bakoitzeko eta 30 minutuz jarduten utzi.
- Sareko ura norberaren garbitasunerako eta arropa normaltasunez garbitzeko erabili daiteke.
- Ez da gomendatzen osasun-kontrolik gabeko ur-iturburuetara edota iturrietara jotzea.
Elikagai-establezimenduetarako ere gomendio bereziak eman ditu Osasun Sailak:
- Edateko ura ontziratutakoa izango da beti.
- Baxera eta sukaldeko tresnak ontz-garbigailuan garbituko dira beti, gutxienez 82ºC-ra. Ontzi-garbigailurik ez badago, behin erabiltzeko baxera erabiliko da.
- Berdin egingo da barra-zerbitzuko baxerarekin.
- Elikagaiak prestatzeko erabiltzen den urari arestian aipatutako tratamendua aplikatuko zaio: irakitea edota ura desinfektatzeko lixiba erabiltzea, hain zuzen ere.
Egoera normaltasunera itzuli bezain laster Osasun Sailak Ataungo Udalari jakinaraziko diola adierazi du.