Zeraingo Garoa gaztandegiko Martina Urbistondo eta Jon Arregiren gaztak hirugarren saria jaso du 16. Gourmet gazta txapelketan. Bertan estatuko kalitate goreneko 800 gazta baino gehiago bildu dira, 20 kategoria desberdinetan banatuta. Zeraingo Garoa gaztandegiko Idiazabal baserriko gaztak hirugarren saria eskuratu du “Ketuen” kategorian.
Artzai Gazta elkarteak adierazi duenez, “Aizkorriko mendilerroaren azpian dagoen herri txiki batean kokatutako gaztandegi tradizional honetan, bi artzain gazte hauek lurrari lotutako bizitza egiteko ametsa bete dute. Bere ardi latxak Zeraingo belardietan bazkatzen dira neguan, gaztandegiaren ondoan, udako hilabeteetan aldiz, Aralarko larreetara igotzen direlarik hurrengo negura arte. Esan beharra dago, bai Jonek eta bai Martinak lanbide aintzindari honengatik benetako pasioa eta konpromisoa sentitu eta isladatu izan dutela beti”.