Urte eta erdi pasa da Zeraingo gazteak elkartzen hasi zirela, herriaren egoeragatik kezkaturik. Euren arteko harremanak finkatu eta ez hausteko helburua zuten. Ekintzak antolatzen eta horietan parte hartzen hasi ziren, beste elkarte edota herritarrekin batera: "Aipatzekoa da ekintza garrantzitsuena gure herriko jaien antolakutzan jardutea izan dela, urteroko ekintzak hobetzen saiatuz eta gustuko musika taldeak ekarriz. Balorazio oso ona jaso genuen eta guztiz eskerturik gaude, jende gehiago ibili eta parte hartze haundiagoa egon zelako."
Hori horrela, taldea ofizializatzeko pausoak ematen joan dira eta behin elkartea osatuta, lehenengo Zeraingo Gazte Festak antolatzea erabaki zuten, beti ere, euren hasierako helburuei eutsiz: "Ekintzak edo festak antolatzeaz aparte, giroa hobetu dadin, beste pauso batzuk emateko asmoa ere badugu. Hasi dugun bideari jarraipena ematea da gure nahia, gaztetxoak elkartera hurbilduz."
EGITARAUA
Ostirala
- Arratsaldean gazteak elkartuko dira dena antolatuta uzteko.
Larunbata
- 18:00etan Herri Kirolak. 'Pike' moduan Segura eta Idiazabalgo gazteak izango dira aurkari. 4 buelta denera: harria altxatzea, koxkol biltzea, korrika, zakua eramatea, txingak eramatea, trontza eta ingudea.
- Amaitzean 19:00ak aldera sagardo dastaketa. 6 sagardo ezberdin egongo dira DJ Oixanik girotuta.
- 22:00etan kontzertuak. Irten Bide eta Muxutruk Erromeria.
Igandea
- Dena txukuntzeko elkartuko dira gazteak.
Afaltzeko ogitartekoak eskuratzeko aukera egongo da Mandion eta Ostatu tabernetan larunbatean. Festan jarraitu nahi duenak, Liztormendi party-ren aukera izango du Liztormendi elkartean. ZGT-k goierritarrak animatu ditu gerturatzera eta ondo pasatzera.
