El Diario Vasco, Radio San Sebastián eta Noticias de Gipuzkoa hedabideetan aditzera eman dutenez, Zeraingo baserri bateko jabeak, senar-emazteak, atxilotu ditu Polizia Nazionalak langileak esplotatzeagatik. Baserri honetan gazta egiten dute eta langileak animalien zaintza eta garbiketaz arduratzen ziren. Aipatutako hedabideetan adierazten denez, langileok asteko zazpi egunetan egiten zuten lan, baita gaixorik zeudenean ere. Hilabeteko 300-400 euro kobratzen zituzten, nagusien borondatearen arabera.
Aranburu markako gazta egiteko erabiltzen diren ardiak zaintzen zituzten langileok.
Kontraturik gabe
Baserriko langileak kontraturik gabe zeuden lanean, eta lautik hiru arauz kanpo daude Estatuan, hau da, paperik gabe. Kontraturik ez dutenez, ez daude Gizarte Segurantzan afiliatuta.
Ardiak zaintzeaz arduratzen ziren langileok, eta horretarako formaziorik jaso ez dutela adierazi zuten. Gainera, lanerako babes neurririk ez zutela ere esan zuten.
Zaurgarritasun egoeran
Aipatutako hedabideetan jakitera ematen denez, langile guztiak egoera zaurgarrian zeuden, euren jatorriko herrialdeetara dirua bidaltzeko beharrarekin.
Atxiloketak ekainaren 5ean egin ziren eta Tolosako Goardiako Instrukzio Epaitegiaren esku jarri ziren baserriko nagusiak.