Iluntzean, kanpai bueltakoak entzun eta hasiera emango zaie festeei baina goizetik hasita festa giroan murgilduta egongo da Zerain. Goiz eta arratsaldean, umeentzako puzgarriak egongo dira eta eguardian, apar festa ospatuko dute plazan. Arratsaldean, Play Back Saioa eskainiko dute herriko txikienek eta ondoren, arratsaldeko 20etan, ofizialki hasiera emango zaie festeei. Indarrak hartzeko, sagardoa eta hegalak dastatuko dituzte herritarrek eta 23etatik aurrera Gau Argi taldeak girotuko du gaua.
Andra Mari egunean, pilota partidak izango dituzte frontoian, txakolina eta txorizo egosia dastatzen duten bitartean. Arratsaldeko 18etan, Zerain eta Segurako gazteen arteko herri kirol apostua ospatuko da plazan eta egunari amaiera emateko mozorroak kalera aterako dituzte zeraindarrek. Gau luzea aurreikusten da, Balantza taldea eta DJ Espuelarekin.
San Roke eguna ospatuko dute asteazkenean. Eguardian, herriko artzainek egindako gazta dastatzeko aukera izango da plazan, toka txapelketarekin batera. Arratsaldean berriz, bola txapelketa eta haurrentzako jolasak antolatu dira. Bertsolariez girotutako herri afariaren ostean, Elustondo anai-arrebak taldeak girotuko du gaua.
Abuztuaren 17an, herri txukundu ondoren, hamaiketa batekin agurtuko dituzte aurtengo festak.