Hasi da Zegama-Aizkorriren asteburua, Kilometro Bertikalarekin. Eguraldi makurra izan da aurtengo lehen proban. Euriari eta hotzari aurre egin behar izan diete korrikalariek. Hori dela eta, ibilbidea ere moldatu behar izan dute. Irauleraino igo beharrean, Itzubiagako txabolarainokoa izan da ibilbidea. Ondorioz, korrikalariek 4,2 kilometroko distantzia eta 756 metroko desnibel positiboko ibilbidea osatu dute.
Angermund eta Brinkman, azkarrenak
Emakumezkoen kasuan, Nienke Brinkman suitzarra izan da azkarrena. 38 minutu eta 21 segundo behar izan ditu ibilbidea osatzeko. Bigarren egin du Miroslawa Witowska poloniarrak (39' 48") eta hirugarren Sladjana Zagorac espainiarrak (40' 23").
Gizonezkoen artean Stian Angermundek behar izan du denbora gutxien Itzubiagara iristeko: 32 minutu eta 47 segundo hain zuzen ere. Dominik Tabor poloniarra izan da bigarrena (33' 15") eta Jose Antonio Bellido espainiarra hirugarrena (33' 31").
Urrestarazu eta Unanue, lehen goierritarrak
Josu Urrestarazu idiazabaldarra 13. gelditu da sailkapen orokorrean, 35 minutu eta 45 segundotan ibilbidea osatuta. Emakumezkoen artean goierritar azkarrena Maider Unanue lazkaotarra izan da. 9. emakume azkarrena izan da 42 minutu eta 23 segundoko markarekin.
Erreportaje zabalagoa, astelehenetik aurrera
Zegama-Aizkorriko Kilometro Bertikalari buruzko bideo erreportaje zabalagoa eskainiko dizuegu, astelehenetik aurrera, Goierri Telebistan eta gitb.eus webgunean. 25. urteurreneko ospakizun ekitaldia, zaleen grina eta maratoia bera ere gurean ikusi ahalko dituzue.