Eguraldi txarrak aldaketak eragin ditu aurtengo Zegama-Aizkorri Kilometro Bertikala proban
Antolatzaileek jakinarazi dutenez, gaur jokatuko den lasterketak aldaketak izango ditu ibilbidean, parte-hartzaileen zein boluntarioen segurtasuna bermatzeko helburuarekin.
Hasiera batean aurreikusitako ibilbidea aldatu dute eta azkenean, korrikalariek 4,2 kilometroko distantzia eta 756 metroko desnibel positiboa izango dituen trazadura osatu beharko dute. Proba osoa kronometratua izango da, Zegamako plazatik abiatu eta Itzubiagako txabolaraino; bertan amaituko da Kilometro Bertikala.
Antolakuntzak azaldu duenez, korrikalariak taldetan abiatuko dira hiru minuturo, eta lehenengo irteera arratsaldeko 16:00etan izango da.
Ez da lehen aldia antolatzaileek eguraldiagatik ibilbidea moldatu behar dutena. Izan ere, 2023ko edizioan ere aldaketa bera egin zuten, segurtasuna lehenetsita.