Kilian Jornetek bere Instagram kontuan egindako argitalpen baten bidez baieztatu du Gipuzkoako proban parte hartuko duela, aurten mende laurdena beteko duen ekitaldian. Mendi-lasterketetako jarraitzaileek, beraz, aukera paregabea izango dute Kilian Jornet zuzenean ikusteko Zegama-Aizkorriko ibilbide ikusgarrian lehian.
2007an irabazi zuen lehen aldiz Zegama-Aizkorri, eta ordutik guztira 11 garaipen pilatu ditu, probaren historiako korrikalaririk esanguratsuena bihurtuz. Azken garaipena 2024an lortu zuen, 3:38:08ko denborarekin. Iaz, ordea, katalanak ez zuen parte hartu egutegiko arrazoiengatik; gizonezkoen kategorian Elhousine Elazzaoui marokoarrak irabazi zuen.
Aurten, gainera, lasterketak 25. urteurrena ospatuko du eta edizio berezia espero da. Dortsalen zozketa jada egin da. Ohiko moduan, milaka lagunek eman zuten izena parte hartzeko aukeraren bila. Azkenean, 1.200 korrikalari inguru izango dira irteeran, munduko mendiko maratoirik ospetsuenetako baten urteurren borobilean.
Kilian Jornetek 2026rako lau lasterketa iragarri ditu: Western States 100 (ekainaren 27a, AEB), Sierre-Zinal (abuztuaren 8a, Suitza), Ultra-Trail du Mont-Blanc (abuztuaren 28a, Frantzia-Italia-Suitza) eta orain Zegama-Aizkorri ere gehitu zaio zerrendari.