Joxe Azurmendi pentsalari, filosofo eta idazle zegamarra hil da uztailaren batean, 84 urte zituela. Zegaman 1941en jaioa, 9-10 urterekin Arantzazura joan zen ikastera. Ondoren filosofia eta teologia ikasi zituen Erriberri eta Arantzazun. 1965ean erbestera ihes egin behar izan zuen eta Europan zehar ikasketa eta ikerketekin jarraitu zuen, frankismo ostean Euskal Herrira itzuli zen arte.
Jakinek balioan jarri duenez, "modernitatearen ideia hegemonikoen irakurketa kritikoa egin du, Euskal Herritik eta euskaraz." 40 liburutik gorako ondarea utzi du.
Euskadi Literatura Saria eta Eusko Ikaskuntza-Laboral Kutxaren Saria jasotakoa da. Gainera, Gipuzkoako Urrezko Domina jaso zuen Jakin Taldearen kide gisa.
Jakinek bere webgunean argitaratutako agurrean ondokoa dio: "Ikasi dizugu mundua eginez egiten dugula gure burua, eta, alderantziz, gure burua eginez, mundua. Obligazio bat dela mundua gure esperientziatik pentsatzea. Euskaldunon problemak gureak direla, baina modernitateak txikitutako gainerako herrien antz handia dutela, eta eurekin aritu behar dugula."
Jakinek berak jakinarazi du ez dela hilbeila ez hileta ekitaldirik izango.