Asteburu betea dute honakoa Zegamako Anduetza parketxean. Batetik, larunbatean, saguzarrak ezagutzeko jarduera egingo dute 19:30ean hasita. Anduetza parketxeko inguruetatik egingo den ibilaldi txikiari ekin aurretik, Lander Olasagasti adituak, ugaztun hegalari hauen ezaugarriak eta bitxikeriak azalduko ditu: orientatzeko erabiltzen duten sistema, ernaltze zikloa, hibernazioa, espezie ezberdinak… Eguna iluntzen duen garaia da saguzarrak behatzeko momenturik egokiena eta gerturatzen direnek animaliatxo hauek entzuteko eta ikusteko aukera izango dute. Plaza mugatuak daude eta erreserba egitea beharrezkoa da. Prezioa 6€ da pertsonako, 4€ 12 urtetik beherakoen kasuan.
Igandean, berriz, San Adrian igarobidera txango gidatua egingo dute. Urtero egiten dute bertan indusketa arkeologikoa Aranzadi Zientzia Elkarteko arkeologoek, Zegamako Udalaren laguntzarekin. Aurtengoa 18. kanpaina izan da eta iaz egindako aurkikuntza garrantzitsu bati segida eman diote: neandertalek kobazuloa babesleku bezala hartu zutela frogatzen duten aztarnak aurkitu dituzte. Duela 40.000 urte baino gehiago duten aztarnak dira. Txango gidatu honetan, neandertalen garaiko azken aurkikuntza arkeologikoak ezagutzera emango dira. Gainera, antzinako hominido horri buruz hitz egingo dugu; ezaugarriak, berezitasunak, ohiturak... baina oraindik asko dago ikertzeko. Eta nola ez, igarobide esanguratsu honetan izan diren biztanleen garai historiko bakoitzaren errepasoa egingo da: Erdi Aroa, Brontze Aroa, Erromatarren garaia…
Anduetza parketxeak antolatu duen txangoak ez du zailtasunik, edozein herritarrentzat egokia da. Ibilaldian izango diren azalpenak bi hizkuntzatan dira. Euskarazko saioa Aldaolako aparkalekutik abiatuko da goizeko 10:00etan eta gaztelaniazko saioa 12:00etan. Aldaola aparkalekua Otzaurtetik (Zegama) 4 kilometrora dago. Aurreikuspena, euskarazko txangoa eguerdiko 11:30erako amaitzea da eta gaztelaniazkoa 13:00rako. Oinetako egokiak eta ura eramatea gomendatzen da.
Saguzarren jardueraren kasuan bezala, izen ematea derrigorrezkoa da. Prezioa ere 6 eurokoa izango da pertsonako.
Bi jardueretan izena emateko jarri kontaktuan Anduetza parketxearekin: 943 80 21 87 / 688 62 36 09 telefonoetan edota anduetza@gipuzkoanatura.eus helbidera idatziz.