Abuztuaren 23an lehertuko da festa Zegaman. Eguardiko 12etan jaitsiko da Belea herriko plazara eta herritarrek mozorroturik egingo diote ongi-etorria. Ondoren, kuadrila bazkaria egingo dute Elizondo plazan eta arratsaldean, XLIV. Zegamako Futbito txapelketako finala ospatuko da. Iluntzean, mozorro lehiaketako sariak banatuko dituzte eta Bide Batez taldeak girotuko du gaua.
San Bartolome egun handian, prozesioa egingo dute herriko txistulari, dantzari eta agintariekin batera, goizeko 11etan. Meza Nagusiaren ondoren, udal-agintariek soka-dantza eskainiko dute Tobera Musika eta Dantza eskolako kideekin. 13:15etan, 2022ko abuztuaren 24tik 2023ko San Bartolome egunera bitartean jaio diren haurrei ongi-etorria egingo zaie plazan.
Arratsaldean, festak ez du etenik izango. 17:00etan apar-jaia izango dute kultur etxeko plazan eta 19:30tan erraldoiak eta buruhandiak aterako dira. Musika eskaintza paregabea izango dute zegamarrek San Bartolome egunean. Zutik elektrotxarangak girotuko du arratsaldeko poteoa, afalostean Musutruk taldeak dantzaldia eskainiko du plazan eta gaueko 23etan Gozategi taldearen kontzertuarekin amaituko dute eguna.
Abuztuaren 25ean bertsolaritza nagusi izango da Zegaman. 13:30etan bertsolarien lehenengo saioa hasiko da udaletxeko arkupean Sebastian Lizaso, Nerea Ibartzabal eta Jexux Mari Irazurekin. Ondoren, bertso-bazkaria egongo da Ostatun eta arratsaldeko 18etan bertsolariek bigarren saioa eskainiko dute. Gaueko 21:30etan Herri Afaria egingo dute eskolako patioan Lumagorri oilaskoa eta Sant Sadurni d´Anoiako cavarekin.
Kuadrilen eguna ospatuko dute larunbatean eta igandean, festeei amaiera emateko paella lehiaketa egingo dute eguardian eta sardina-jana arratsaldean. Gaueko 22:45etan agur esango diote Beleari.