Zaldibia, Itsasondo eta Legorretako hainbat ikaslea bizikletaz joan dira gaur Oianguren institutura, zaldibitarren eskola garraioa berrezartzea eskatzeko. Instituturaino duten bidea bizikletaz egiteko ez dela segurua adierazi nahi izan dute ekimen honen bidez.
Dekretuaren arabera, salbuespena litzateke zaldibitarren kasua
Hezkuntza Sailak 164/2023 dekretua alikatuz erabaki du Zaldibiako DBH 3 eta 4ko ikasleei eskola garraioa kentzea hasi berria den ikasturtean. Izan ere, dekretuak dioenez, 4 km baino gutxiagora bizi diren ikasleek ez dute eskola garraiorako eskubiderik. Zaldibia 3,8 km-ra dagoela ebatzi du Hezkuntza Sailak. Hala ere, salbuespenak badaude neurri hau aplikatzeko, eta dekretuan bertan zehazten da: "Salbuespenez, tresna informatikoaren bidez kalkulatutako oinezko ibilbidea egingarria ez bada bide-segurtasuneko gutxieneko baldintzak betetzen ez dituelako, zenbaketatik kanpo utziko da, eta, haren ordez proposatutako ibilbideen artean, benetan oinez baldintza egokietan egingarria den kilometro gutxienekoa hartuko da kontuan." Zaldibia eta Ordizia artean ez dago bidegorririk, ez oinezko biderik, mendiz egiten ez bada. Dekretuan ondoren adierazten denez, "salbuespen hori aintzat hartzeko, ezinbestekoa izango da ikaslea matrikulatuta dagoen ikastetxeak ziurtatzea bidea ezin dela baldintza egokietan oinez egin, eta proposatzea desegokia dela. Hala badagokio, lurraldeko-ordezkaritza eskudunak ontzat emango du proposamena."
Honen aurrean, Zaldibiako Guraso Batzarrak bide juridikoa ireki duela jakinarazi du eta, Arartekora jotzeaz gain, Eusko Legebiltzarrera ere eramango du gaia.