Zaldibiako DBH 3 eta 4ko ikasleak eta haien gurasoak protestan ari dira pasa den ikasturte amaieratik, Oianguren Institutura joateko eskola garraiorako eskubiderik ez dutela jakinarazi zietenetik. Hezkuntza Sailak argudiatzen du 164/2023 dekretuaren arabera ikastetxetik 4 km baino gutxiagora bizi diren ikasleek ez dutela garraio eskubiderik. Ikasle zaldibitarrek 3,8 km-ko distantzia dute.
Pasa den astean Hezkuntza Ordezkaritzan izandako bileran berretsi zen erabakia: institutura joateko garraio publiko erregularra erabili beharko dute ikasleek, eta eskola garraioa izango dute itzulerarako. Bilera hartan Hezkuntza Saileko ordezkariek konpromisoa hartu zuten lehen eskola egunean, astearte honetan hain zuzen ere, bertan egiaztatuko zutela garraio erregularra egokia izango zela ikasleentzat. Zaldibiako Guraso Batzarrak adierazi duenez, ez da inor agertu egiaztapen lanak egitera.
Eserlekurik ez denentzat
Goizeko 8:00etako autobusean eserlekurik gabe gelditu dira 12 ikasle. 8:30eko autobusaren zain gelditu direnez, berandu iritsi dira ikastetxera eta, ondorioz, berandutzea ezarri diete irakasleek, eskola ikuskaritzaren aginduz. Pasa den astean izandako bileran ikasle guztientzako eserlekuak bermatuko direla esan zuen Hezkuntzak, gurasoek jakinarazi zutenez. Gurasoek argitu nahi izan dute "derrigorrezko hezkuntzaz ari garenez, bere garaian zerbitzu hori martxan jarri zela, garraiatzeko baldintzak ez direlako berdinak linea erregularra eta eskola garraio publikoaren artean. Arau batzuk bete behar ditu eskola garraioa izateko. Eserleku bat ikasle bakoitzarentzat izatea, doakoa izatea, ikasleen arduradunak izatea ikastetxean, abiadura muga bajuagoak, ordutegiak, autobusaren egoera, 10 urte gehienez etab... Adin txikiko ikasleei dagozkien eskubideak dira, eta zerbitzu hori kentzean, eskubide horiek galdu dituzte ikasleek."
Eskolako lehen egunean gertatutakoa ikusirik, eskola garraioa berrezar dezatela eskatu dio Zaldibiako Guraso Batzarrak Hezkuntza Sailari.
