Zaldibiako Udalak eskola-garraioa bermatzearen aldeko adierazpen instituzionala onartu zuen aho batez uztailaren 2an egindako Osoko Bilkuran. Udalak argitaratutako testuaren bidez, Eusko Jaurlaritzako Hezkuntza Sailari eskatu dio berriz azter dezala datorren ikasturtetik aurrera Oianguren BHIko DBH 3. eta 4. mailako ikasleei eskola-garraio zerbitzua ez eskaintzeko hartutako erabakia.
Udalaren arabera, Oianguren BHIko zuzendaritzak 2025/2026 ikasturtea amaitu ondoren jakinarazi die familiei datorren ikasturtetik aurrera DBH 3. eta 4. mailako ikasleek ez dutela eskola-garraio zerbitzurik izango. Hezkuntza Sailak erabakia ikastetxea eta bizilekua lau kilometro baino gutxiagora daudela argudiatuta hartu duela azaldu du Udalak.
Adierazpen instituzionalean jasotzen denez, neurriak zuzenean eragingo lieke Zaldibiako 40 ikasletik gora eta haien familiei. Udalaren esanetan, egoera horrek ikasleak auto pribatuaren menpe uztea, une jakin batzuetan garraio publikoan lekurik ez izatea edo autoentzako prestatutako errepidetik oinez nahiz bizikletaz joan behar izatea ekar dezake.
Horren aurrean, Zaldibiako Udalbatzak Eusko Jaurlaritzari eskatu dio erabakia berriz aztertzeko eta inplikatutako familiekin elkarrizketa abiatzeko, guztiontzat bidezkoagoa, seguruagoa eta koherenteagoa izango den konponbidea bilatzeko. Era berean, Udalak adierazi du prest dagoela bitartekaritza lanak egiteko eta konponbide bat lortzeko lanean laguntzeko.
Adierazpenean, Udalak gogorarazi du Zaldibian ez dagoela Derrigorrezko Bigarren Hezkuntzako ikastetxerik eta, ondorioz, Jaurlaritzaren betebeharra dela ikasleei eskola-garraioa bermatzea. Halaber, hezkuntzarako eskubidea eta landa-eremuaren garapena oinarri izanik,zerbitzu publikoen alde antolatuko diren ekimenekin bat egingo duela adierazi du, baldin eta Hezkuntza Sailak hartutako erabakia bertan behera uzten ez badu.
Adierazpen instituzionala aho batez onartu zuten EH Bilduko eta EAJ-PNVko udal ordezkariek.