Azahara Domínguez Mugikortasuneko, turismoko eta Lurralde Antolaketako diputatua izan da gaur goizean Ioritz Berra alkatearekin batera martxoaren 8an eskainiko diren Lurraldebus zerbitzu berezien berri emanez. Aurten, Zaldibian izango da Emakumearen Nazioarteko Egunean eskualdeko manifestazioa eta Udalak egindako eskaerari erantzun dio diputatuak.
Dominguezek adierazi duenez, "10:40, 11:20 eta 12:00etan abiatuko dira Beasaingo Renferen geltokitik, 10:50, 11:30 eta 12:10ean geldituko dira Ordiziako Renferen geltokian eta 11:00etan, 11:40ean eta 12:20an iritsiko dira Zaldibiara (Bilore)". Aitzitik, "zerbitzu bereziak 13:30ean, 14:00etan eta 14:40an irtengo dira Zaldibiatik, 13:40an, 14:10ean eta 14:50ean geldituko dira Ordizian, eta 13:50ean, 14:20an eta 15:00etan iritsiko dira Beasainera".
"Gero eta gipuzkoar gehiagok garraio publikoa erabiltzea nahi badugu, ezinbestekoa da garraio publikoaren erabilera sustatzea. Zerbitzu berezi horiekin, M-8ko manifestazioan parte hartu nahi duten goierritarrek autobusez egin ahal izatea errazten dugu, ibilgailu pribaturik izan gabe " azpimarratu du diputatuak eta manifestazioan parte hartzeko gonbitea zabaldu du: "Borroka feministari esker aurrerapen handiak lortu diren arren, gizonen eta emakumeen arteko desberdintasuna oraindik ere gertaera bat da, eta ultraeskuinaren diskurtso ukatzaileak nagusitzen ari direla dirudi. Berdintasuna pertsona guztioi dagokigun borroka da eta horregatik garrantzitsua da martxoaren 8an kalean aldarrikatzea".
Amaitzeko, "Mugikortasuneko, Turismoko eta Lurralde Antolaketako Departamentutik garraio publikoaren erabilera sustatzen jarraituko dugu, pertsona guztiek bizitza publikoan baldintza berdinetan parte hartu ahal izan dezaten. Eta, gainera, gure autobusak espazio seguruak eta berdintasunezkoak izan daitezen lan egiten dugu. Horretarako, Lurraldebusen eraso matxisten aurkako lehen protokoloa prestatzen ari gara, eta aurten kaleratuko dugu ", gehitu du.
Ioritz Berra Zaldibiako alkateak aurtengo M8ko eskualdeko ekimen nagusia Zaldibian jasotzea pozgarria dela adierazi du: "Herri txikietan ere mobilizazio garrantzitsuak egin daitezkeela erakutsiko dugu. Zaldibiako Aske talde feministaren eta Goierriko Koordinadora Feministaren eskaerei erantzunez, egokia ikusi genuen gure herrirako garraio publikoa indartzeko eskaera egitea. Horregatik oso eskertuta gaude Mugikortasuneko, Turismoko eta Lurralde Antolaketako Departamentuari, eskaera honi modu positiboan erantzuteagatik. Goierritarrak Zaldibiarako joan etorria garraio publikoan egiteara animatzen ditugu”.
