San Joan sua debekatu du Udalak

Eusko Jaurlaritzako Segurtasun Sailak hiru egunez jarraian ezarriko du alarma gorria aparteko beroaldiagatik. Izan ere, asteazkenera arte 40 graduko tenperaturak gainditzea aurreikusten da. Hau guztia dela eta, Eusko Jaurlaritzako Segurtasun Saileko Larrialdiei Aurre Egiteko eta Meteorologiako Zuzendaritzak, landa eremuetan San Joan  gaueko surik ez egitea gomendatu du, erabakia Udalen esku utziz. 
Honen aurrean, Segurako Udalak zabaldu duen ohar baten bidez, erantzukizunez jokatzea dagokiela adierazi du eta San Joan suak egiteko debekua ezarri du. Erabaki honen ondorioz, “landa eremuan eta baserri inguruetan, orokorrean Segura osoan, San Joan sua egiteko debekua ezarri dugu udaletik, behar ez den arriskurik hartu beharrik ez dago eta.” Herriko festetako hitzordurik nagusiena izanik,  “Arboladi ondoan egiten den herri-akelarrea, kontrolatutako su txiki batekin egingo dela” gaineratu du Udalak, era sinbolikoan.