Kantoietatik Kantaurira kantua ari du! Hauxe izango da 2024ko Iparra Hegoa ekimenaren leloa. Antolatzaileek 27. Edizioaren datak eta egitaraua jakinarazi dute. Martxoaren 4tik 10ra ospatuko da Iparraldea eta Hegoaldea Seguran batuko dituen festa. Baina aurretik eta ondoren ere ekintzak antolatu dira.
Aurten oso presente izan nahi dute orain 27 urte Urruñako Berttoli eta Segurako Elorri elkarteek sortutako harremana indartsu mantentzen dela eta Iparra Hegoari esker harremanak sendotzen, kultura elkartrukatzen, urrunduak gerturatzen eta nortasuna eraikitzen jarraitzen dutela.
Egitarau zabala antolatu dute aste osoan zehar eta kantua eta kantak gaitzat hartuz bi hitzaldi antolatu dira. “Kantua herri kohesiorako eta herri erresistentziarako” hitzaldia eskainiko da martxoaren 4an, Jon Maia, Beñat Sarasola, Joanes Borda, Eneko Labeguerie (Guk taldea) eta Marina Landaren eskutik . Martxoaren 5ean berriz, “Kantatzen duen herria ez da inoiz hilko” hitzaldia antolatu da. Bertan Karine Etxeberri, Olaia Inziarte, Lide Hernando eta Joseba Tapia arituko dira.
Bestelako ekintza ugari ere egongo dira noski, musika, antzerkia, gatronomia, tailerrak, denetik eta denontzako aukerak egongo dira Iparra Hegoaren baitan. Aste kulturalaren atariko Ihesi antzezlana izango da Segurako Botikaxaharran otsailaren 17an.
