Azken hilabeteotan Ormaiztegin ikaleko katuen kopuruaren hazkundearen ondorioz, Ormaiztegiko Udalak boluntarioak eskatu ditu hurrengo komunikatuaren bidez:
"Azken hilabeteetan kaleko katuen kopurua kontrolik gabe hazten ari da Ormaiztegin. Horrek arriskua dakarkie beste espezie batzuei, eta gizakiekin bizitzearen arazoa dakar: zikinkeria, usain txarrak edo gaixotasunen transmisioa dira horien ondorioetako batzuk. Baina ez da ahaztu behar katuentzat beraientzat dagoen arriskua, babesik gabe eta kalean tutoretzarik gabe bizitzeagatik, gaixotasunen, elikagai faltaren eta eraso eta jarrera bortitzen ondorioz.
Udalak HAI metodoa jarri nahi du martxan, hau da, animaliak harrapatu, antzutu eta itzuli edo askatu, bai eta elikadura kontrolatuko sistema bat ere, ez baita positiboa kaleko katuak gainbegiratzerik gabe elikatzea, borondaterik onenarekin eginda ere. Animalien ongizatea eta gizakiekiko bizikidetza hobetzea bilatu behar dugu.
Jarduera horiek gauzatu ahal izateko, Udalak boluntarioak behar ditu zeregin horietan lagundu ahal izateko, gure inguruko udalerri gehienetan gertatzen den bezala.
Interesatuek udaletxera deitu edo zuzenean joan ahal izango dute, eta bertan beren datuak jasoko dira. Hortik aurrera, Udala bera jarriko da harremanetan interesdunekin, lehen bilera bat deitzeko, eta aurreikusitako jarduerak zehatz-mehatz azalduko dira."