Gaurtik aurrera Irizar ie truck NG bi kamioik jasoko dituzte Donostiako hondakinak. Ormaiztegin egin dute bi ibilgailuen aurkezpena Irizarren instalazioetan. Bertan izan dira Eneko Goia, Donostiako alkatea eta Carlos Garcia, Hiri Mantentze eta Zerbitzuetako zinegotzi ordezkaria Donostiako Udalaren ordezkari gisa, baita Imanol Rego Irizar Taldeko CEOa, Josu Letona Irizar ie truck ibilgailuaren arduraduna eta Miquel Gutierrez Irizar ie truck ibilgailuaren salmenta arduraduna ere.
Belaunaldi berriko ibilgailu horiek Irizar Gen3 bateriak dituzte, 307 kWh-ko energia ontziratuarekin eta 360 kWko gehienezko potentzia duen Irizar sistema traktore batekin. Alboko kargadun karrozeria da, 21m3-ko edukierarekin eta 9.200 kg-ko karga erabilgarriarekin. Ezaugarri horiekin, bi kamioiek Donostiako hirian eskatzen diren ustiapen eta autonomia eskakizunak betetzen dituzte. Hirian kutsadura atmosferiko eta akustikorik sortu gabe zirkulatu dezakete.
Errotulazio berezia dute gaur aurkeztutako bi kamioi hauek. Izan ere, ibilgailuen atzeko aldean haurrek sortutako marrazkiak daude, Aniztasun eta Berdintasun Zinegotzigoak "Gure hiria aurkituz" izenburupean deitutako lehiaketara aurkeztutakoak.