Ordiziako tokiko merkataritza sustatzeko asmoz, bono-kanpaina berria jarri du martxan Ordiziako Udalak. Ekimenaren bidez, herriko merkataritza eta zerbitzu sektoreari bultzada eman nahi diote, herritarrak tokiko establezimenduetan kontsumitzera animatuz.
Guztira, 3.000 erosketa-bonu jarriko dira salgai. Bonu bakoitzak 30 euroko balioa izango du, baina erosleek 20 euro baino ez dituzte ordaindu beharko; gainerako 10 euroak Ordiziako Udalak jarriko ditu. Azaroaren 16tik aurrera eskuratu ahal izango dira, agortu arte, Ordiziako Merkataritza Bulegoan (Santa Maria kalea, 21). Bonu hauek abenduaren 16ra bitartean erabili ahal izango dira.
Herriko 74 establezimendutan erabili ahal izango dira bonu hauek. Udalak herritarrak tokiko eskaintza ezagutzera eta herrian erostea lehenestera animatu nahi ditu, bereziki udazken-neguko denboraldian eta Gabonetako erosketen atarian.
Maitane Alvarez alkateordearen esanetan, tokiko merkataritza funtsezkoa da Ordiziako kaleak bizirik mantentzeko, eta bono-kanpainak herriko saltokiei laguntzeko aukera eskaintzen du. Zorion Intsaustik, Oreka belardendako arduradunak eta Ordizian elkarteko lehendakariak, herrian erostearen garrantzia nabarmendu du, eta herritarrak tokiko establezimenduen aldeko hautua egitera animatu ditu.