Dolores Gonzalez Katarain, Yoyes, gogora ekartzen duen erakusketa aurkeztu dute gaur Ordizian, haren erailketaren 40. urteurrenean. Ekitaldian María Jesús San José Justizia eta Giza Eskubideetako sailburuak, Alberto Alonso Gogora Institutuko zuzendariak eta Adur Ezenarro Ordiziako alkateak parte hartu dute.
Erakusketak Yoyesen ibilbide pertsonal eta politikoa jasotzen du, baita ETArekiko izan zuen bilakaera ere. Lau panel bikoitzek osatzen dute erakusketa, Yoyes hil zuten tokian bertan kokatuta. Bertan hainbat hedabidetako argazki-kazetarien lanak, garaiko hemeroteka eta Yoyesen egunerokoetatik ateratako pasarteak biltzen dira. Azken horiek familiak eta gertukoek 1987an argitaratutako "Yoyes, Desde su ventana" liburutik hartuak.
Beste atal batek, Ordiziako eta Goierriko gizarteak hilketaren aurrean emandako erantzuna jasotzen du. Martxak, protesta-elkarretaratzeak eta greba orokorra egin ziren, eta «Askatasunaren alde Yoyesekin» kanpainak 8.000 sinadura baino gehiago bildu zituen, horietatik 1.500 inguru Ordiziako bizilagunenak. Erakusketan Agustin Ibarrolaren gutun bat eta giza eskubideen aldeko beste ekimen batzuk ere jasotzen dira. Halaber, Yoyesen omenez 1986ko urriaren 18an Ordizian egindako kontzertuari tarte egiten dio. Herri plataformak antolatutako ekitaldia hilketaren aurkako mobilizazio sozialaren parte izan zen, eta bertan hainbat musikarik eta bertsolariek parte hartu zuten.
Aurkezpenean, San José sailburuak indarkeriaren erabilera gaitzetsi eta disidentziarako eskubidea nabarmendu du: “Ezerk ez du justifikatzen indarkeriaren erabilera”, adierazi du. Halaber, Ordiziako eta Goierriko gizartearen erantzunari buruz esan du “gizartearen zati baten adoreak eta indarkeriarekiko gogaitasunak beldurra gainditzea lortu zuen” unea erakusten duela erakusketak.
‘Yoyes’ erakusketa Ordiziako Barandiaran plazan egongo da ikusgai urriaren 16ra arte.