Argi Berri Elkarteak eta Ordiziako Udalak antolatutako Lazkao Txiki Bertsopaper Lehiaketaren 35. edizioa amaitu da, eta epaimahaiak saridunak zeintzuk izan diren jakinarazi ditu. Aurkeztutako lanak Manu Olano, Lander Arizmendi eta Izar Sarriegik osatutako epaimahaiak baloratu ditu.
13 urtera arteko mailan, "Lazkao Txikik 100 urte" gaiarekin, bost lan aurkeztu dira, eta lehen saria Eleder Lavillak (Iruñea) eskuratu du. Bigarren postuan Ekai Legorburu (Hernani) sailkatu da eta hirugarrena Maialen Urtxegi (Narbarte) izan da. Aurten, berrikuntza gisa, eskualdeko lan onenaren saria ere banatu da maila honetan, eta Lexuri Bastida altzagarrak jaso du.
14 eta 18 urte bitarteko mailan lau lan aurkeztu dira. Kattalin Arabolazak (Oiartzun) lortu du lehen saria, eta bigarren zein hirugarren sariak hutsik geratu dira.
Helduen mailan izan da parte-hartzerik handiena, 19 lan aurkeztuta. Ekaitz Goikoetxea beasaindarrak irabazi du lehen saria, eskualdeko lan onenaren aitortzarekin batera. Bigarren saria Oier Etxeberriarentzat (Azpeitia) izan da, eta hirugarrena Amaia Agirrerentzat (Asteasu). Bestalde, epaimahaiaren aipamen berezia Iraitz Sarasola ordiziarrak jaso du.
Sari banaketa irailaren 6an, igandean, egingo da, 12:00etan, Ordiziako Barrena Kultur Etxeko Bertsolari Eskolaren gelan. Sariak Ordiziako Udaleko ordezkari batek, Argi Berri Elkarteko presidenteak eta Joxe Miel Iztueta "Lazkao Txiki" bertsolariaren ilobek, Martina eta Mari Josek, banatuko dituzte. Ekitaldia amaitzean, bertaratutako guztientzat otamena eskainiko dute Buztuntza auzoko Argi Berri Elkartean.