Ordiziako Udalak, herriko zerbitzu publikoak hobetu eta herritarren beharretara egokitzeko, haurren pixoihal-aldagailuak instalatu ditu udalerriko bost komun publikotan: Plaza Nagusian, Garagartza plazan, Bonberia Zaharreko eraikinean, Barrena parkean eta Bilordi parkean.
Jarduketa hau udal-aurrekontuetan jasotako konpromisoetako bat da, eta herriko familiei espazio publikoetan erosotasun handiagoa eskaintzea du helburu.
Inbertsio txikia, eragin handia
Instalatutako aldagailuen materialak 1.125 euroko kostua izan du. Muntaketa eta instalazio lan guztiak, berriz, udal brigadako langileek egin dituzte, kanpoko enpresarik kontratatu gabe.
Adur Ezenarro alkateak ekintza txiki hauen garrantzia azpimarratu nahi izan du: "Familien egunerokoa errazten duten neurriak dira hauek. Zerbitzu publikoak hobetzea ez da beti obra handiak egitea; askotan, herritarrek benetan behar dituzten xehetasunak zaintzea da."
Udal langileen lana aitortuz
Alkateak, bide batez, udal brigadako langileen profesionaltasuna eta inplikazioa bereziki eskertu ditu. Ezenarrok gogorarazi duenez, azken emaitzaren atzean langileen "lan handia" dago, eta kasu honetan ere haiek arduratu direla lan guztiaz, "udalaren baliabideak ahalik eta ondoen aprobetxatuz".
Ekimen hau Ordiziako Udalak irisgarritasuna, zaintza eta herritarren ongizatea bermatzeko martxan dituen neurrien parte da, udal-ekipamenduak gero eta erabilgarriagoak, erosoagoak eta inklusiboagoak izan daitezen.