Herritarrek aukera izango dute 2026ko Santa Ana jaietako txupinazoan parte hartuko duen laugarren protagonista aukeratzeko. Iaz abian jarritako ekimenari jarraipena emanez, Udalak herriarentzat berezia izan den pertsona edo elkarte bat proposatzeko deia egin die ordiziarrei.
Proposamenak ekainaren 24ra arte aurkeztu ahal izango dira, posta elektronikoz komunikazioa@ordizia.eus helbidera bidalita, WhatsApp bidez 688 817 583 zenbakira idatzita edo Barrena jauregian horretarako jarritako kutxan utzita. Hautagaiaren izena eta proposamenaren arrazoia zehaztu beharko dira, eta pertsonak nahiz elkarteak aurkeztu ahal izango dira.
Jasotako proposamenen artean, Udalak lau finalista hautatuko ditu, eta horien izenak ekainaren 25ean jakinaraziko ditu. Ondoren, herri bozketa zabalduko da, eta herritarrek finalisten artean aukeratu ahal izango dute txupinazoa botako duen pertsona edo taldea. Pertsona bakoitzak boto bakarra eman ahal izango du.
Bestalde, 2026ko Santa Ana jaietako txupinazoan Azari Elkarteak, Txindoki Atletismo Taldeak eta Boxing Elkarteak parte hartuko dute, urtean zehar ospatzen ari diren urteurrenen aitortza gisa.
Uztailaren lehen hamabostaldian emango da ezagutzera nortzuk izango diren aipatutako hiru elkarteekin batera txupinazoaren protagonistak.