Gipuzkoako Foru Aldundiak, Kultura eta Gazteria Departamentuaren bidez, Gipuzkoan Gazte Tour 2026 programaren geldialdi berri bat antolatu du Ordizian. Ekimen honen helburua lurraldeko gazteei gaur egungo kultura-proposamen parte-hartzaileak hurbiltzea da.
Jarduerak ekainaren 5ean eta 6an egingo dira. Ostiralean, 18:00tatik aurrera dantza-masterclass bat egingo da Dorretxen. Maitane Pérez Madrazo dantzari eta irakasleak emango du saioa eta parte hartzeko, aldez aurretik izena eman behar da.
Larunbatean berriz, edizio honetako kontzertu nagusia eskainiko da. Garagartza plazan arratsaldeko 19tan hasiko da emanaldia eta Nerea García ordiziarrak emango dio hasiera jardunaldiari, herriko talentu hasiberrien ordezkari gisa.
Aimarz eta ASFA izango dira karteleko artista nagusiak eta azken saioa Ordiziako Undercarrot DJk emango du. Honek, genero eta soinu urbanoen nahasketan oinarritutako proposamen batekin itxiko du ekitaldia.
Adur Ezenarro Ordiziako alkateak azpimarratu duenez, “gazteei zuzendutako ekimenak ezinbestekoak dira haien interesak eta beharrei erantzuteko, eta horregatik egiten dugu urte osoan ahalegin berezia gazteentzako eskaintza erakargarria sustatzeko. Kulturak ere gazteengana iritsi behar du, haien hizkuntza eta interesekin bat eginez, eta Gipuzkoan Gazte Tour bezalako ekimenek aukera hori eskaintzen dute”.
Isaac Palencia, Kultura Sustapen eta Gazteriako foru zuzendariak balioa eman dio programan artista gazteek eta tokiko talentuak parte hartzeari. "Gazte askorentzat, behetik hasi eta beren bidea eraikitzen ari diren artistak oholtza gainean ikustea inspirazio-modu bat ere bada. Gazteen aldeko apustua egitea haien sormenean, hizkuntza berriak eraikitzeko gaitasunean eta kultura-espazio propioak okupatzeko eskubidean konfiantza izatea da", adierazi du.