Manex Berzosa kultura zinegotziak azaldu duenez, lehiaketak urtero harrera ona izaten du eta aurten ere herritarrak parte hartzera animatu nahi dituzte, jaiak denonak direlako.
Lehiaketak bi adin-talde izango ditu: 18 urtetik gorakoena eta 18 urtetik beherakoena. Edozein kategoriatako parte-hartzaileak irabazi ahal izango du kartel nagusia, eta saridunak 500 euro jasoko ditu. Horrez gain, haurren kategoriako lan berezi batek 100 euroko bono saria izango du eta programaren barruan argitaratuko da.
Kartelaren gaiak Ordiziako Santa Ana jaiak izan beharko ditu ardatz, eta derrigorrez “SANTA ANA JAIAK 2026 / ORDIZIA” testua eta udalaren logotipoa agertu beharko dira. Lanek errespetuzko edukia izan beharko dute, estereotipo edo diskriminazio mezurik gabe.
Parte hartu nahi duen edonork gehienez bi lan aurkez ditzake, betiere originalak eta argitaratu gabeak badira. Ez dira onartuko adimen artifizialarekin sortutako lanak.
Kartelek 60x42 zentimetroko neurria edo proportzio bera izan beharko dute. Nahitaezkoa izango da bertsio digitala JPG formatuan aurkeztea, nahiz eta nahi izanez gero euskarri fisikoan ere entregatu ahal izango den. Egilearen datuak aparte aurkeztu beharko dira.
Lanak aurkezteko azken eguna ekainaren 24a izango da, eguerdiko 12:00ak arte. Lanak posta elektronikoz (kultura@ordizia.eus) helbidera edo Udaleko Harrera Bulegoan aurkeztu ahal izango dira.
Epaimahaiak kalitate nahikorik ez dagoela uste badu, lehiaketa hutsik uzteko aukera izango du. Gainera, saritutako kartelaren eta haren erreprodukzio eskubide guztien jabetza Udalaren esku geratuko da.