Ordiziako Idiazabal Gaztaren Kofradiak 36. Kapituluaren ospakizuna izan zuen larunbatean. Urtero legez, kofradiakide berriak eta ohorezko kofradiakideak izendatuko zituzten.
Goizeko 10:30ean eman zioten hasiera egunari kofradiakideei eta gonbidatuei eskainitako gazta dastaketarekin. Ondoren, Oroith Abesbatzak ongi etorri kontzertua eskaini zuen eta 12:15ean kofradia guztiak desfilean joan ziren udaletxeraino. Plazan familia argazkia atera ostean, Batzar Aretoan eman zitzaion hasiera izendapenen ekitaldiari.
Adur Ezenarro alkatearen agurra jaso ondoren aurtengo kofradiakide berriak izendatu zituzten: Amaia Ajuria Urrujulegi, Maider Muguia Baztan eta Vanessa Mendoza Martinez.
Ondoren, ohorezko kofradiakideen txanda heldu zen. Lau izan ziren Kofradiaren familiara batu direnak:
- Josu San Vicente Saenz de Ugarte: Arabako San Vicente de Aranako Idiazabal gazta egiten duen artzaina
- Alberto Vesga: Sustrai fruta dendako arduraduna, Ordiziako Azokarekin duen lotura zuzenagatik
- Azari Ehiza eta Arrantza Elkartea: aurten 100 urte betetzen dituelako.
- Euskal Sukaldaritza Berriaren sortzaileak beren sorreraren 50.urteurrenagatik. Sukaldarien ordezkari gisa, Hilario Arbelaitz , Tatus Fombellida eta Ramon Roteta sukaldariak bertaratu ziren.
Ekitaldiaren ostean, Martinez jatetxean senidetasun bazkaria egin zuten.