Ordiziako Udalak argi publikoaren hobekuntza eta modernizazioa abiatu du, 2030 Ekintza Planaren barruan CO₂ emisioak %30 murrizteko helburuarekin. Jarduketa honen bidez, ordezkatuko diren luminariaren energia-kontsumoa gutxienez %75 murriztea aurreikusten da, eta horrek energia-eraginkortasuna handitzea, CO₂ emisioak gutxitzea eta mantentze-kostuak murriztea ekarriko ditu, ingurumenaren eta udal baliabideen mesedetan.
Argiteria berritzeko lanak honako gune hauetan egingo dira, besteak beste: San Bartolome auzoan eta N-I errepiderako irteerako bidean; Egutera bidean eta Santa Ana aparkalekuan; Sanperio, Arana eta Arramendi kaleetan eta Anexotik Kiroldegira doan bidean.
Horrez gain, hainbat luminaria solte ere ordezkatuko dira, Santa Amalia eta Filipinak bidegurutzearen inguruan, Buztuntzatik, Mallutz industrialderako pasabidean, Joseba Rezola kalearen hasieran, eta beste puntu batzuetan. Lan hauek egiteko jarduketaren aurrekontua 81.834,24 eurokoa da.
Azken urteetan, Ordiziako argiteria publikoaren hiru laurdenak LED sistemara ordezkatu dira, energia-eraginkortasuna eta jasangarritasuna hobetuz. Udalak azpimarratu du egindako aldaketa horiei esker dagoeneko sarearen zati handiena berrituta dagoela, eta 2030 urtea baino lehen herri osoko argiteria sistema LED teknologiara aldatzeko helburua betetzea aurreikusten dela.