Ordiziako Udalak, Batera Aske Kooperatibarekin elkarlanean, ‘Ordizia Mugimenduan’ programa pilotua abiatuko du, aniztasun funtzionala duten gazteei zuzendutako aisialdi, kultura eta hezkuntza espazio sortzaile eta irisgarriak eskaintzeko helburuarekin.
‘Ordizia Mugimenduan’ egitasmoa 12 (DBH1etik hasita) eta 25 urte bitarteko gazteei zuzenduta dago, eta lehentasuna Ordiziako biztanle eta ikasleek izango dute. Jarduerak doakoak dira, Ordiziako Udalak sustatuta.
Programa honek sormena, gorputza, mugimendua eta jolasa ditu ardatz. Bere helburua gazteen gizarteratzea, ongizatea, autoezagutza eta harreman osasuntsuak sustatzea, metodologia berritzaile eta pertsonalizatuen bidez.
‘Ordizia Mugimenduan’ egitasmoaren lehen topaketa urtarrilaren 15ean, ostegunean, izango da, 18:00etan, Zuhaizti egoitzan, ate irekien jardunaldi modura. Bertan, gazteentzako sormen tailerra eta familientzako mahai-ingurua egingo dira, 2026rako aurreikusitako programaren nondik norakoak aurkezteko.
Izena emateko bash@bateraaske.com helbidera idatzi behar da edota 680 15 57 46 telefono zenbakira deitu.