Euskal Jaien barruan ospatzen den Emaneurre Euskarari eguna izango dugu larunbatean Ordizian. 2011n sortu zuen Emaneurrek ohitura bilakatuko zen eguna, Euskal Jaietan herritarren eta gazteen parte-hartzea sustatuz eta kirol parte hartzaile eta herrikoiak bultzatuz. Urte hauetan zehar izandako erantzun onaren ondorioz, aurtengoa antolatzeko hauspo eta indar berriak batu direla adierazi du antolakuntzak eta egitarau ederra izango dute larunbatean.
Goizeko 10:00etan jokatuko dira herri kirolak Joxe Migel Barandiaran plazan. Irabazlea jakin ondoren, bazkaria egingo dute plazan eta Marki eta Sukia izango dira bazkalondoren. 18:30etan talde argazkia egingo dute eta Joseto ta Alayak elektrotxarangarekin batera ibiliko dira alde zaharrean zehar. Eguna ondo amaitzeko, gaueko 23:00etan Gozategiren kontzertua egongo da plaza nagusian.
Goierri Irrati Telebistan porra zabaldu dugu, zein taldek irabaziko du aurten herri kiroletan? Asmatzen dutenen artean 1990n otordua zozkatuko dugu, animatu eta parte hartu!
