Alberto Martinez Osasun sailburuak Osasun Sailaren eta Osakidetzaren egituretan aldaketak iragarri ditu, "etorkizuneko euskal osasun-sistemaren oinarriak finkatzeko".
Aldaketa hauen artean dago Maite Martinez de Albeniz ordiziarraren izendapena. Aurrerantzean, Donostialdeko ESIko zuzendari gerentea izango da Martinez de Albeniz, "lurralde honek bultzatzen duen eta Euskadi osoan eragina izango duen osasun-poloaren garapenerako eta proiekziorako funtsezko etapa batean". Proiektu estrategiko handiak abiarazteaz arduratuko da; besteak beste, Osakidetza tratamendu onkologikoan nazioarteko abangoardian jarriko duen protonterapia-zentro berritzailea.
Maite Martinez de Albeniz doktorea neurologoa da, gaixotasun zerebrobaskularretan aditua, eta Kudeaketa Sanitarioko masterra du. Azken urtean, Osakidetzako Asistentzia Sanitarioko zuzendari gisa jardun du, eta ikuspegi eguneratua eta estrategikoa eman dio erakundeari. Aurretik, Neurologiako Ospitalizazioko burua eta Iktusaren Unitateko koordinatzailea izan zen Donostia Unibertsitate Ospitalean; zuzendariorde medikoa zentro berean, eta Neurologiako irakasle EHUn. Gainera, esperientzia handia izan du ikerkuntzan eta estatu-proiektuetan, eta Neurologiako Espainiako Elkarteko presidenteordea izan da (2022-24).