Adur Ezenarro, Ordiziako alkateak helarazitako ohar batean, larunbat gauean gertatutakoa "onartezina" dela eta horrelako jarrerek Ordizian "lekurik ez" dutela adierazi du. Asteburuan izandako liskarren harira informazioa biltzen ari dela jakinarazi du. Gertatutakoaren berri izan bezain laster Segurtasun Sailburuarekin eta Tolosako Ertzainburuarekin harremanetan jarri zela dio, agenteen egoeraz galdetzeko.
Ordiziar batzuk ere erasotuak
Gainera, liskarretan ordiziar batzuk ere erasotuak izan zirela jakinarazi du, eta horien inguruko informazioa biltzen ari direla, babesa eta ardura azaltzeko.
Honen guztiaren aurrean astelehen arratsalderako Bozeramaileen Batzordea deitu du alkateak urgentziaz, gaia lantzeko.
Bi atxilotu
Larunbat gauean jazo ziren gertakariak, ertzainak borroka baten berri jaso eta Araba kalera hurbildu zirenean. Ertzaintzak berak egindako kontakizunean adierazten denez, lehen patruila batek hiru gizon ikusi zituen kalean gora ihes egiten. Ertzainek atzetik jarraitu zieten. Une horretan, beste pertsona batzuk, ustez lehenengoen senideak, ertzainen lana oztopatzen hasi ziren.
Ertzaintzaren arabera, pertsonen jarrera bortitzak tentsioa areagotu zuen bertan, eta gizonetako batek, bereziki oldarkor egon zenak, atzetik jo zuen ukabilaz ertzain bat, eta lurrera erori zen, konortea erdi galduta. Erasotzailea atxilotu egin zuten agintaritzaren aurkako atentatuaren eta lesioen delitu batengatik, bitartean berarekin zeuden pertsonek polizia-baliabideen aurka egiten zuten. Ertzainek beren defentsa-elementuak erabili zituzten erasoei aurre egiteko. Igandean bigarren pertsona bat atxilotu zuen Ertzaintzak.
Gertakariaren ondorioz, lau ertzain zauritu ziren. Batek ospitaleratuta jarraitzen du.