Bi kategoria izango ditu lehiaketak, 18 urtetik gorakoak eta 18 urtetik beherakoak. Bi kategorietako edonork irabazi ahalko du jaietako programaren azal nagusia, 500 euroko sariarekin. Bestalde, haurren kategoriako lan bat hautatua izango da programa barnean txertatuta joateko eta lan horrek 100 euroko bono saria eskuratuko du.
Lehiaketan parte hartzeko hainbat oinarri izan behar dira kontuan. Batetik, kartelaren irudiak Ordiziako Santa Ana jaiekin zerikusia izan behar du eta “SANTA ANA JAIAK 2025 /ORDIZIA” testua ondo nabarmenduta egon behar da bertan, Ordiziako logotipoa konposizioan integratuz.
Edukian ez da pertsonen aurkako edozein eratako errespetu falta erakusten duten jarrerarik aurkeztuko. Ideia originalak eta jendaurrean aurkezteko modukoak izan beharko dira.
Edonork hartu dezake parte lehiaketan eta bakoitzak bi lan aurkeztu ahal izango ditu, gehienez. Kartela 60 zm-ko altuerako eta 42 zm-ko zabalerako neurriekin aurkeztu beharko da. Bertsio digitalean (JPG formatuan erresoluzio onarekin), kultura@ordizia.eus helbidera bidalita edo Udaletxean CD batean aurkeztu beharko da eta bertsio fisikoan, zuzenean Udaleko Harrera Bulegoan entregatuta (08:00-13:30).
Lanarekin batera, fitxategi batean edo gutunazal batean, egilearen datu pertsonalak eta NAN dokumentuaren kopia atxikita egon beharko da.
Kartelak aurkezteko azken eguna ekainaren 24a izango da, 12:00etan.