Joan zen astean, Aralar kudeatzeko hamar urterako Plan Orokorra adostu zuten Gipuzkoako Foru Aldundiak eta Enirio-Aralar Mankomunitateak. Natur eta kultur ondarearen babesa, hobekuntza eta zaintza sustatzeaz gain, hiru eremu estrategikotan bideak egokitzea aurreikusten zuten akordio honetan.
Gipuzkoako ENBA nekazal sindikatuak, akordio politikoa irakurri eta aztertu ostean, “positibotzat” jotzen dute, bi erakundeen artean elkarlana bideratzea eta datozen urteetarako, Enirio-Aralarko eremuan egingo diren lan eta aktuazioen gida izatea. Hala ere, azken urteetan azaldutako beharrak kontuan izanik, aurkeztutako akordioa eta plana nahikoa ez dela azaldu du sindikatuak.
Plan orokorrean finkatutako helburuetan, artzainen txaboletara eta goiko larre tokietara sarbideak egiteko hamar urte behar izatea gehiegizko iruditzen zaie. Horrez gain, akordioan Arritzaga, Elutseta eta Pagabeko bideak aurreikusten dira, baina ENBAren ustean, hauek ez dira nahikoak abeltzainek dituzten beharrak asetzeko. Izan ere, 2015-2019 kudeaketa planean, beste hainbat sarbide zerrendatzen ziren.
Plan Orokorrean, ardi, behor eta behi espezieen arteko borroka planteatzea salatzen du baita sindikatuak.
