Urteko sasoi honetan ohiko den bezala, asteazkeneroko azokak bisitari ugari jaso ditu aste honetan. Horien artean LGTBI+ arloko nazioarteko 14 influencers gerturatu dira Ordiziara, Gipuzkoako Foru Aldundiko Mugikortasuneko, Turismoko eta Lurralde Antolaketako Departamentuak antolatutako fam trip esklusibo batean. Bisita hau, Basquetourrek antolatutako The LGBTI+ Travel Symposium nazioarteko topaketaren baitan kokatzen da. Euskadin, maiatzaren 7tik 9ra egingo den topaketa honetan aniztasunarekin, inklusioarekin eta berrikuntzarekin konpromisoa duten turismo-sektoreko profesionalak, helmugak eta enpresak bilduko dira.
Ordiziara egindako bisita Delikatuz zentroan hasi dute. Bertan, Adur Ezenarro alkateak harrera egin die eta ondoren azoka bertatik bertara ezagutzeko aukera izan dute. Goierriko egonaldia, gaztandegi bat bisitatuz eta sagardotegi batean bazkalduz amaituko dute.