Ordiziako klubak, bere sare sozialetan jakinarazi zuen joan zen asteazkenean, Federico Gallok ez zuela taldea entrenatzen jarraituko hurrengo denboraldian. Gallok hiru urte egin ditu Ordiziako lehen taldean, baina hemendik aurrera erronka profesional berriak izango dituela azaldu zuten publikazioan. Aldi berean, klubak eskerrak eman dizkio argentinarrari, hiru denboraldi hauetan egindako lanagatik.
Albiste honen ostean, egun gutxitara, klubak denboraldi honetarako entrenatzaile berri bat aurkeztu zuen bere sare sozialetan. Hain zuzen, Suso Romero izango da Ampo-ko entrenatzaile berria, hurrengo denboralditik aurrera.
Entrenatzaile andaluziarrak, 18 urtez azpiko Espainiako selekzioko teknikarietako bat izan da eta Sevillako Errugbi Zentroa zuzendu du orain arte. Aurretik, Ciencias taldeko jokalaria izandakoa da baita. 2023-2024 denboraldian Real Ciencias taldeko entrenatzaile kargua hartu zuen, baina 2024ko urrian kluba utzi zuen.
Ordiziako klubak azaldu duen bezala, teknikari andaluziarrak, jokalarien garapenean eta talde lehiakorrak zuzentzen esperientzia handia du eta klubaren proiektuaren gidaritza hartuko du, prestakuntza, tokiko talentua eta baloreak oinarri hartuta.