Bertako saltoki edo zerbitzuen sektorea sustatzeko helburuarekin eta Ordiziako merkataritza ingurunea dinamizatzeko asmoz antolatutako kanpaina hontan, sektore ezberdinetako 97 establezimenduk parte hartuko dute.
Kanpaina honek bi ekimen izango ditu; alde batetik erakusleiho lehiaketa eta bestetik Urratu jokoa. Lehiaketan parte hartzen duten saltokiek, udaberri giroarekin apaindu beharko dituzte haien erakusleihoak eta hiru saltoki onenek, 300, 200 eta 100 euroko sariak jasoko dituzte. Honez gain, botoa ematen duten herritarren artean, 100 euroko bale bat zozketatuko da.
Botoa emateko epea, apirilaren 29an amaituko da eta apirilaren 30an irabazleen izenak jakinaraziko dituzte. Botoa emateko aukera www.ordizian.eus webgunean eta haien sare sozialetan egongo da.
Bestalde, kanpainaren Urratu jokoan, bezeroak saritu eta erosketak bultzatzeko helburuarekin, saririk jaso ez duten txartelek 500 euro irabazteko aukera izango dute apirilaren 16ean egingo den zozketaren bitartez. Txartelen atzealdean izen-abizenak eta telefono-zenbakia idatzi beharko dute eta ORDIZIAN Bulegoan egongo den postontzian sartu.
