Goierriko Talde Internazionalistak hitzaldi ziklo berri bat antolatu du Ordizian. Lau hitzaldiz osatutako zikloa izango da eta lehena ostegunean, martxoaren 27an egingo da Barrena jauregian. "Venezuela setiopean" izango da gaia eta herrialdeak gaur egun bizi duen egoera ulertzeko gakoak emango dituzte Askapeneko Iñaki Etaiok eta Aitor Juaristik.
Ostiralean berriz, Siriara gerturatuko dira, Ander Aranburuk eskainiko duen hitzaldiarekin: Siriar errepublika arabiarraren historia eta bere erorketa.
Hurrengo bi hitzaldiak apirilaren 3an eta 4an egingo dira. Datorren ostegunean, Hijas del Nabka ikus-entzunezkoa proiektatuko da eta ondoren Palestinaren inguruko mahai-ingurua eskainiko da, BDZko Alaitz Amundarainen parte-hartzearekin.
Azkenik apirilaren 4an, ostirala, Insumisa ikus-entzunezkoaren bitartez, Saharara gerturatuko dira eta ondoren Garazi Hach Enbarek Irizarrek solasaldia eskainiko du.
Ekitaldi guztiak arratsaldeko 18etan hasiko dira, Barrena jauregian.
Goierriko Talde Internazionalista iaz sortu zen Goierri mailan sentsibilizazio internazionalista sustatzeko helburuarekin.