"Ekimena, hezkuntza komunitateak erabakiak hartzerakoan duen partaidetza indartzeko eta udalerriko hezkuntza arolo eragileen arteko elkarrizketa eta koordinazio espazio bat bermatzeko helburuarekin" onartu zen mozioa, Ordizia Orain - Elkarrekin Podemosen esanetan.
Ordiziako hezkuntza-erronkei modu egituratuan heltzea ahalbidetuko duen organo egonkor bat izateko beharrari erantzuten dio kontseilu honen sorrerak eta helburu nagusia gune bat sortzea izango da, non ikastetxeetako ordezkariek familiek, ikasleek eta sektoreko profesionalek, udalarekin eta udaleko talde politiko guztien ordezkariekin batera, udalerriko hezkuntza hobetzen lagunduko duten proposamenak lantzeko aukera izango duten.
Begoña Pedrosa, Eusko Jaurlaritzako Hezkuntza sailburuak, honakoa adierazi zuen Jon Hernandezi emandako erantzunean 2025eko otsailaren 7ko kontrol saioan: "baina, era berean, berretsi nahi dut hezkuntzak bakarrik ezin diola aurre egin segregazioari, eta beharrezkoa da udalerri bakoitzeko eragileen arteko lan komunitarioa eta gizarte kohesioa lortzea; eta Ordizian, beste leku askotan bezala, udal eskola kontseilua martxan jartzeko beharra dago. Saiakerak egin dira, badakit, ze udalarekin hartu-emana izan dugu, baina jarraitu behar dugu saiakera horietan, ze udal eskola kontseilu hori zubi izango da kohesio sozialean eta bitartekaritzan eragiteko".
Hitzetatik ekintzetara
Viviana Murillo Cazar eta Julen Iraola Matxain zinegotzi eta mozioa bultzatu zuen udal taldearen partaideek honakoa adierazi zuten osoko bilkuran: "Hezkuntza funtsezko zutabea da gure gizartean, eta uste dugu Kontseilu hau funtsezko tresna izango dela hezkuntza-komunitatearen eta tokiko administrazioaren arteko elkarlana indartzeko. Orain, hurrengo urratsa bere funtzionamenduari forma ematea da, eta benetan eta eraginkortasunez parte hartzeko gunea izatea bermatzea". Horrela, euren asmoa adierazpen batean bakarrik ez geratzea eta erabakitakoa inplementatzea eta modu eraginkor batean aurrera egitea dela azpimarratuz.
Datozen asteetan Udalak Kontseilua martxan jartzeko izapideak hasiko dituela espero dutela aipatu du Ordizia Orain - Elkarrekin Podemosek; parte hartzeko irizpideak, osaera ete lehen helburuak ezarriz. Baita ere, ekimena bultzatzen jarraituko dutela eta Udal Hezkuntza Kontseilua epe laburrean errealitate eraginkorra izan dadin, prozesuari laguntzeko konpromisoa berretsi du.
Bukatzeko, Ordiziako hezkuntza-komunitateari deia egin zaio, "aurrerapenei adi egoteko eta herritar guztientzako hobekuntza-tresna izan nahi duen gune honen eraikuntzan aktiboki parte hartzeko".