‘No phone challenge’ egitasmoa Ordiziara iritsi da. Oianguren Institutuko DBH4 mailako 9 ikaslek eta 6 irakaslek gaur utzi dituzte mugikorrak gelan, eta astebetez (batzuk ostiralera arte eta beste batzuk astelehenera arte) mugikorrik gabe egoteko erronka onartu dute.
Ordiziako Udalak adierazi duenez, prozesuaren jarraipena egiteko, parte hartzaile bakoitzari liburuxka edo koaderno bana eman zaio eta bertan, ikasle nahiz irakasleek haien bizipenak kontatu ahal izango dituzte.
Ordiziako III. Adikzio Plana
Egitasmoa hau Ordiziako Adikzio planaren baitan kokatu du Udalak eta “Mugikorraren auzia” formazio saioaren ondorio da. Izan ere, ikasturte honetan, Maitane Ormazabal eta Telmo Lazkano adituen eskutik, formazio saioa jaso zuten, eta egitasmoaren bigarren pausoa, astebetez mugikorrik gabe egotea izango da. Helburua, mugikorraren erabileraren gaineko kontzientzia sortaraztea, eta azken batean, mugikorraren erabilera osasuntsu bat bultzatzea da.
Herri mailako lanketaren ondoren, proposamena ikastetxe ezberdinei egin zaie. Oraingoan Oianguren Institutua izan da erronkari heldu diona, baina aurrerantzean, posible da beste ikastetxe batzuek ere bat egitea.