Ordiziako Udalak herriko bizia, baliabideak eta elkarteak gertutik ezagutzeko ‘Ordizia Ezagutu’ egitasmoa jarri du martxan. Ordiziar guztiei irekitako aukera izango da; iritsi berriei, urte batzuk bertan bizitzen daramatzatenei eta betidanik herrian bizi direnei, deialdi berezia egin nahi zaiela.
Otsailaren 26an hasi eta apirilaren 11ra arte, astean bi egunetan egingo dituzte saioak. Asteazken eta ostiraletan goizeko 10:00etatik 12:00etara bilduko dira eta saioak hiru bloke nagusitan banatuko dituzte.
Lehena, herriko biziari eskainiko diote. Ordiziako kultura, historia eta abar ezagutzeaz gain, jakingarri praktikoak landuko dira ere. Gainera, herriko azpiegiturak eta udal baliabideak ezagutzeko bisita gidatuak egingo dituzte.
Bigarrenean, hainbat arlotako baliabide publikoak ezagutuko dituzte. Enplegu zerbitzuak, osasun zentroa, ongizate zerbitzuak eta atzerritartasun legea edota atzerriko tituluen homologazioa landuko dira.
Bukatzeko, herriko dinamikak ezagutuko dituzte. Horretarako, herriko elkarteetako dinamikak ezagutu eta egonaldiak egingo dituzte haiekin. Herriko agenda eta ekitaldien berri emango zaie ere.
Parte hartu nahi izanez gero, 679 87 67 79 zenbakira deituz edo aniztasuna@ordizia.eus helbidera idatzita eman daiteke izena. Parte-hartzaile guztiek ziurtagiria jasoko dute saioen amaieran.