Hauteskundeen ondotik Ordiziako Udala eratu zela 15 hilabete bete diren honetan, tarte honen balantzea egin nahi izan du Ordiziako EAJko Udal taldeak. “Ordiziako biztanleen beharrei erantzutea” helburu hartuta, “errespetuan eta erantzukizunean oinarrituta” oposizio eraikitzailea egiten ari dela azaldu du, “beste alderdien oposizioa egiteko mduaren oportunismoari eta demagogiari lekurik eman gabe”.
Oposizio eraikitzaile honen adibidetzat jarri ditu ordenantza fiskalen eta tasen onarpena, baita aurrekontuena ere. Bi kasuotan, EAJren proposamenek “gobernu-taldeak aurkeztutako proiektuak hobetzen lagundu” dutela argudiatu du.
Udal gobernuari kritikak
Legegintzaldiaren balantze honetan Udal gobernuari kargu hartu diote zenbait arlotan. Batetik, HAPOaren “tramitazio eza” deitoratu dute, “paralisi garrantzitsua” egotziz.
Bestetik, “modu persmisiboan zabartutako Ordiziak” kezka eragiten diela adierazi dute, “Ordiziaren irudia jokoan” dagoela azpimarratuz. "Ustezko adierazpen askatasun baten aitzakian”, historikoki ezker abertzaleak gobernatu izan dituen “hiri eta herrien antza har dezan saiatzen ari da EH Bilduren gobernua: pankartaz, kartelez betetako herria, hiri-altzarietan, erakusleiho itxietan...”.
EAJk “politika serio bat ezartzen” jarraituko duela adieraziz amaitu dute idatzia, “elkarrizketara irekia eta proaktiboa, eta aldi berean zorrotza” izango dela zehaztuz.