Irailaren 7an ospatuko da Emaneurre euskarari eguna

Euskal jaien atarian Emaneurre taldeak antolatzen duen “Emaneurre euskarari” eguna irailaren 7an ospatuko da. Egun osoko festa izango da, goizean kuadrilen arteko herri kirol saioa antolatu dute eta ondoren herri bazkaria. 
Plaza Nagusian ospatuko da herri kirol txapelketa eta aurten 20 taldek eman dute izena. 8 laguneko taldeak izango dira eta hauexek dira egin beharreko lanak: arrauna, korrika, koxkolak, txingak, trontza, harria eta zakua. 
Kirolaren ondoren etorriko da kantu bazkaria. Herri kiroletan parte hartzen ez dutenek ere bazkarirako aukera izango dute: txartelak Sugaar, Amonane eta Kirkilen daude salgai, 13€tan.
Aurten Azterketak Euskaraz kolektiboa omenduko du Emaneurre taldeak. Horregatik, Etxeparetarrak herri kiroletan eta gainontzeko ekintzetan parte hartuko dute.
Bazkaria girotzen Saioa Lizarralde eta Maddalen Arzallus bertsolariak arituko dira. Musika ere protagonista izango da irailaren 7an, arratsaldean Elektrokela elektrotxaranga ibiliko da kalez kale eta Gozategiren kontzertuak emango dio amaiera egunari.